তাজমহলৰ বিৰুদ্ধে

মুকুল পাঠক 

তাজমহল কেতিয়াও দেখা নাই
ফটো দেখিছো
গৰিমা শুনিছো
মইি নাজানো তাজমহল আচলতে কি
ছাহজাহানৰ প্ৰেম নে মুমতাজৰ সৌন্দৰ্য
নে সম্ৰাটৰ অহমিকা
নে প্ৰেমৰ নামত মুমতাজক কৰা প্ৰতাৰণা
চৰিত্ৰৰ দিশেৰে সম্ৰাটো হেনো নাছিল চহকী
নিজ কন্যালৈ দিছিল লোলুপ দৃষ্টি
মুমতাজো নাছিল তেওঁৰ একমাত্ৰ পত্নী
তেন্তে তাজমহলৰেই প্ৰয়োজনেই বা আছিল কি
মাত্ৰ প্ৰসস্তি ?
হায় মুমতাজ !
তুমিতো নাজানা
কিমানবাৰ প্ৰেমৰ পুজা হৈছে তোমাৰ সমাধিত
কিমানবাৰ উচ্ছাৰিত হৈছে তোমাৰ নাম
কিমানবাৰ গৰ্বীত হৈছে ভাৰতবৰ্ষ
কিমানবাৰ লোৱা হৈছে মোগলৰ নাম
কিমানবাৰ ?
কিমানবাৰ মুমতাজ ?
তুমি এটা নাম নহয়
তুমি ইতিহাস
তুমি প্ৰতীক
তুমি সপোন
তুমি দিঠক
আৰু বহুতো কিবা নাম নজনা গৌৰব তুমি
কিন্তু তুমি নাজানা
তুমি প্ৰেমৰ নামত হোৱা প্ৰতাৰণাৰো সৌধ
প্ৰেমৰ নামত তুমি অহংকাৰৰ দৌল
তোমাৰ পতীৰ প্ৰেমে নিশকতীয়া কৰে প্ৰেমৰ সংজ্ঞা
আছিল জানো সেই প্ৰেম অমৰ কৰিব লগা
কিয় পিন্ধোৱা হৈছিল প্ৰেমৰ প্ৰতীক মালা
ছাহজাহানক লগ পালে সুধিলো হেতেন
বিছ হাজাৰ শ্ৰমিকৰ নাছিল নেকি হৃদয়
নাছিল নেকি তেওঁলোকৰ পত্নী প্ৰেম
নাছিলনে বাৰু এগৰাকী মুমতাজ বুকুৰ মাজত
সেয়া কি প্ৰেম নাছিল ?
তেন্তে তাৰ স্বীকৃতি ক’ত ?
কিয় ছাহজাহান কিয় নিদিলা শ্ৰমীকৰ প্ৰেমৰ মুল্য
তেওঁলোকেওতো পত্নী প্ৰেমৰ বাবেই কাম কৰিছিল
সোতৰ বছৰ ধৰি চলাই গৈছিল
ঘাম পেলোৱাৰ যুঁজ
মুমতাজবাদ চহৰত খোদিত হৈছিল নে তেওঁলোকৰ নাম
দহ হাজাৰ হাতীয়ে টানিছিল প্ৰকাণ্ড শিলৰ পাহাৰ
সুদুৰ চীন আৰু তীব্বতৰ পৰা অনাইছিলা পাথৰ
ওস্তাদ আহমেদ লাহাউৰিৰ নিখুত হাতৰ পৰশত
ছবি হৈ জিলিকিছিল তাজ
আমানত খান চিৰাজীয়ে লিখিছিল আখৰ
আৰু ইছমাইল খান আফ্ৰিদী ?
যাৰ হাতেৰে আকাশ মুখি মুধচ গঢ়াইছিলা
সেই সকলৰ নাছিল নেকি প্ৰেম
তেতিয়া ক’লৈ গৈছিল তোমাৰ প্ৰেমীক মন ছাহজাহন ?
তোমাৰ চকুত ধৰা পৰা নাছিলনে এবাৰো
তেওঁলোকৰ হৃদয়ৰ প্ৰেম ভালপোৱা
ভালপাব পৰাকৈ তেওঁলোকৰো কিজানি আছিল
আশাৰে ভৰা এখনি কোমল হিয়া
সেই অন্যায় কৰিও আজি তুমি বন্দিত
নিজ প্ৰেমৰ প্ৰশংসাত মদমত্ত
তুমি প্ৰেমীক নে কামুক
মমতাজৰ মৃত্যু কোনে সজাইছিল
চৈধ্যটা সন্তানে কিয় ভৰাই নুতুলিলে তোমাৰ মুমতাজ প্ৰেম
প্ৰসৱ কালীন মৃত্যু কোনে জাপি দিয়া
ছাহজাহান উত্তৰ দিয়া
উত্তৰ দিয়া
তথাপিও কিয় নগলিল তোমাৰ হিয়া
আছিল জানো স্বৰ্গীয় অনুভৱী প্ৰেম তোমাৰ মনত
তাজমহলত কিয় নিজিলিকিল সেই মহানুভৱতা
হ’ব পাৰে তাজমহল মুমতাজৰ স্মৃতি সৌধ
এয়া প্ৰেম নহয়
সম্ৰাটৰ অহংকাৰ
তোমাৰ যোগ্যতা নাই প্ৰেমৰ নামত থিয় দিয়াৰ
তোমাৰ বাবে লজ্জানত হয় পবিত্ৰ প্ৰেম
তাজমহল সাজিলেই প্ৰেম প্ৰমানিত নহয়
হেৰা তাজমহল
নাথাকিলেই যেনিবা মুমতাজ
নাথাকিলেই যেনিবা সম্ৰাটৰ বল আৰু শৌৰ্য
তথাপিও আমি প্ৰেমীক
হৃদয়ৰ পৰা
সেই প্ৰেমক তুমি অপমান কৰিছা
তোমাৰ বাবেই উপলুঙা হৈ পৰে
নিঃকিন হৈ পৰে দৰিদ্ৰৰ প্ৰেম
মচিবতো নোৱাৰো তোমাৰ ইতিহাস
ভাঙিবও নোৱাৰো
সেইবাবেই
সেইবাবেই মইও আজিও চোৱা নাই তোমাক
প্ৰেমৰ কোমলতাত তুমি পৰাজিত প্ৰতীক
তোমাৰ দৰ্শন নহলেও হৃদয়ৰ পৰা আমিবোৰ প্ৰেমীক
প্ৰেমীক বাবেই মোৰ ওচৰত মূল্যহীন তুমি
ধিক তোমাৰ প্ৰেম ছাহজাহান
অহংকাৰ তোমাৰ প্ৰেমীকা
মুমতাজ নহয় |